الكشرى المصرى على أصوله

أكلتنا النهاردة هى طبق الكشرى اللذيذ اللى كلنا بنحبه , لو عاوزة تعمليه زى اللى فى السوق تعالى معايا شوفى طريقتنا , طعم ولا أشهى منه واحسن شئ انك هتكونى عارفة مصدره وواثقة من نظافته , كونى دايما أم شاطرة وقدمى كل الأكلات اللى أسرتك بتحبها .
 
المقادير :

2 كوب أرز مغسول

كوب عدس بجبة

4 كوب ماء

1/2 كيلو مكرونة صغيرة

2 بصلة متوسطة مقطعة شرائح لعمل التقلية

4 معالق كبيرة زيت

ملح وفلفل
 
الصلصة:

ثوم مفروم

2 معلقة كبيرة زيت

كوب ونصف عصير طماطم

معلقة كبيرة خل

ملح وفلفل وشطة

طريقة التحضير:
1- اغسلي العدس كويس جداً، وحطيه في مصفاة علشان ينزل ميته، وبعد كده نقيه كويس.

2- حطي الزيت في حلة على نار متوسطة لغاية ما يتقدح، وبعد كده حطي البصل وقلبيه في الزيت لغاية ما لونه يبقى ذهبي أو بني فاتح.

3- شيلي البصل من على النار وحطيه على مناديل ورقية علشان تشرب الزيت.

4- ضعي العدس في نفس الحلة اللي عملتي فيها البصل، وقلبيه كويس مع الزيت، وبعد كده غطيه بالماء وتبليه بالملح والفلفل، وبعد كده قللي درجة الحرارة وسيبيه لمدة 25 دقيقة أو لغاية ما يبدأ يستوي.

5- بعد كده ضيفي الأرز وقلبيه كويس مع العدس، وبعد كده تبليه بالملح والفلفل والكمون، وسيبيه على نار هادئة لغاية ما يستوي، وممكن تضيفي ماء لو حسيتي إنه محتاج.

6- في الوقت اللي الكشري والعدس بيستوا فيه، اسلقي المكرونة وصفّيها بعد ما تستوي وتسيبيها على جنب.

الصلصة:

1- سخني الزيت على نار متوسطة، وبعد كده ضيفي عليه الثوم وقلّبيه في الزيت لمدة دقيقتين، وبعد كده ضيفي عصير الطماطم ومعاه الملح والفلفل والشطة، وسبيها على نار متوسطة لغاية ما تبدأ في الغليان، وبعد كده هدي النار عليها وسيبيها لمدة 10 دقائق.

2- بعد كده ضيفي الخل وسيبيه لمدة 5 دقائق كمان، أو لغاية ما تحسي إن الصلصة استوت، وبكده تكون جاهزة علشان تقدميها مع الكشري.

عند التقديم بتحطي الأرز والعدس الأول وعليهم كمية من المكرونة، وعلى الوش بتحطي صلصة الطماطم والتقلية (البصل المحمر)؛ وعلشان الوجبة تبقى متكاملة ممكن تقدّمي معاها سلطة خضراء وبيض مسلوق.

وبالصحة والهنا…