أحمد أمين يعلن عن توقف برنامج "البلاتوه"

أعلن الفنان أحمد أمين عبر بيان نشره، مُنذ قليل، عبر حسابه الرسمي بموقع التواصل الاجتماعي "فيس بوك" عن توقف برنامجه "البلاتوه".

وقال أمين، في بيانه المنشور: "برنامج البلاتوه وقف؛ والحلقات المعروضة حاليًا حلقات معادة، وداخلين على سنة كاملة تقريبًا ماعملناش حلقات جديدة".

وكشف أمين عن سبب توقف البرنامج قائلًا: "توقف البرنامج كان بسبب قرار من قناة النهار لتعرضهم لبعض المشاكل المالية، والتفاصيل أنا مش عارفها".

وأضاف: "للأسف ده ترتب عليه حاجات كتير.. أولًا: اعتذرت عن كل الشغل اللي كان ممكن أعمله عشان عايز اتفرغ للبرنامج، وكانت القناة بتوعدنا كتير إننا راجعين لكن كلها كانت وعود وبس والله يعينهم على التحديات اللي هما فيها.. فبقيت قاعد في البيت مكبوت عندي حاجات عايز أقولها ومش عارف.. ولإني متعاقد مع القناة ما ليش حق إني أشتغل في قناة تانية".

وفي بيانه؛ قال "القناة بدأت تنزل إعلانات على المحتوى القديم بطريقة مسيئة جدًا للمحتوى.. وطبعًا أنا اعترضت كذا مرة ومافيش فايدة.. فابتدت توصلني تعليقات سلبية من ناس ليها كل الحق تزعل لأن أنا شخصيًا منزعج وبقيت ما بحبش أشوف صفحة البرنامج ولا فيديوهات البلاتوه طبعًا مع كل الاحترام للإعلان نفسه، وللمعلن لكن أنك تقطع عمل فني وتحشر فيه إعلان بالشكل ده.. عيب".

وقال أمين: ثالثًا: "كل يوم ناس كتير بتسألني البلاتوه فين.. وأنا ما كنتش عايز أرد احتراما للقناة اللي كانت سبب في ظهور أول برنامج تلفزيوني ليا.. بس أنا كنت ساكت طول الفترة اللي فاتت عشان فيه ناس من فريق العمل ليهم مستحقات مالية ولسه لغاية النهاردة ماخدوش فلوسهم (وأنا منهم) فكنت أتمنى أننا نرجع نشتغل لكن يبدو أن ما فيش فايدة".

واختتم أحمد أمين المنشور بقوله: "أنا ممكن اتحمل كل المشاكل السابقة إلا ان الناس تبدأ تزعل من محتوى أنا تعبت فيه عشان يسعدهم ويرضيهم.. أدعو لي أعرف أرجع أقدم اللي كنت بحبه زي ما كنت.. وأشكركم على صبركم علينا.. و بعتذر عن كل إساءة أو تأخير ياريت القرار كان في إيدي.. لكن ما باليد حيلة.. وربنا يكتب لنا رزقنا في فرصة حلوة جديدة أعرف أعمل لكم حاجة تسعدكم".